[Erreportajea] Hamaika emanaldik osatuko dute udako kultur agenda
Uztailaren 2tik abuztuaren 27ra bitarteko egitaraua aurkeztu du aste honetan udalak. Jaiei dagokienez, iaz baino kultur ekitaldi gehiago iragarri arren, egoera aztertzen ari direla adierazi dute.
Psilocybeen taldeak Erreginaren Baluartean iazko udan eskainitako kontzertua. 
2021eko udari begira antolatutako kultur eta aisialdi jardueren berri eman du aste honetan Hondarribiko Udalak, Txomin Sagarzazu alkatearen eta Juan Luis Silanes Kultura zinegotziaren bitartez. Uztailaren 2an hasi eta abuztuaren 27ra arteko agenda da aurkeztutakoa, herriko festetan zer-nolako egitaraua atondu ahal izango duten aztertzen ari baitira oraindik. Hala ere, kultur ekitaldi gehiago izango direla aurreratu zuten agintariek.
Hondarribiarrei zein bisitariei zuzendutako plangintza dela zehaztu zuen Sagarzazuk. Aforoak malgutzeko Iñigo Urkullu lehendakariak plazaratutako dekretuaren inguruan, erabakirik ez dutela hartu erantsi zuen alkateak.
Kontingentzia eta segurtasun planei erreparatuta, Itsas Etxea Auditoriuma, Kasino Zaharra eta Erreginaren Baluartea izango dira jardueren agertoki nagusiak. Aire librean garatutako ekitaldiak lehenetsiko direla zehaztu zuen Silanesek, eta eguraldiak behartuta aldaketarik egin beharko balitz, Soroetako pilotalekura, eta beharren arabera Jostaldira lekualdatuko dituztela adierazi zuen.
Zabaldutako informazioaren arabera, 28 izango dira denera antolatutako ekitaldiak: hamalau musikarekin lotuak egongo dira, hiru dantzarekin, lau zinemarekin eta zazpi hainbat diziplinetakoak izango dira, hala nola, arte eszenikoak, Bidasoa Folk jaialdia edota Herri Giroa bezalako artisau azoka.
Herriko sortzaileak
Hondarribiko sortzaileei «aukera berezia» emango zaiela ere jakinarazi zuen Silanesek. Hala, nabarmendutakoen artean, ondokoak aipatu zituen: Maria Rallo Muguruza organo jotzailea uztailaren 17an; Sorotan Bele gogoan izenpeko ekitaldia Gorka Sarriegi, Urbil Artola eta Hondarribia Hiria Musika Bandaren eskutik uztailaren 18an; edota Eskifaia eta Xatz abesbatzen udako kontzertua uztailaren 30ean. Ekitaldi guztietarako sarrerak ordainpekoak izango dira. Kultur ekitaldiei «garrantzia» emateaz gain, sarrerak hartu eta emanaldira bertaratzen ez direnen kopurua murriztea da horren helburua.
Antolatutako emanaldiak 19:00etan hastea aurreikusi badute ere, ordutegi batzuk zehazteke daudela oraindik edo aldaketak izan ditzaketela bukatu zuen Silanesek.
Bertan kontsulta daitezke uztaila eta abuzturako aurreikusitako ekitaldiak.
