Landetxa auzoaren memoria berreskuratzeko testigantza bila dabil auzo elkartea
"Gure arbasoen historia zuzenean ezagutu" nahi dute elkartekoek. Bideo bat osatuko dute, 1930-1955 urteen bitartean auzoan gertatutakoa kontatzeko.
Irungo Landetxa Auzo elkarteak “gure auzoko historia gure auzoko bizilagunen ahotik kontaturik jasotzeko” egitasmo berezia abiatu berri du. Duela urtebete sortutako ideia baten bitartez, 1936ko estatu kolpea gertatu aurreko eta ondorengo bi hamarkadetako testigantzak bildu nahi dituzte, hala nola argazkiak, dokumentuak eta objektuak, eta horiekin, bideo bat osatu nahi dute.
“1930 urtean auzoko bizitza aurrera zihoan eta bat batean 1936an estatu kolpea eta gerra etorri zen gure artera. Egunerokotasunean eragin zuzena izan zuen: gerrara joan beharra soldadu bezala, ihesian atera, beldurra, bonbetatik ezkutatua, eguneroko goseak, eskola itxiak eta zenbait historia gehiago! Baina, gerra ondorengoa ere ez zen hobea izan askorentzat”, esan dute elkarteko kideek hedabideei bidalitako ohar batean.
“Gure historia galdu aurretik” gertatutako hori jaso nahi dute, eta horregatik, auzoan bizi diren bizilagunen testigantzak biltzea da euren asmoa. Batetik, Nola gogoratzen dituzu 1930-1955 urteak? galdera egin nahi diete auzokideei, eta bestetik, aipatutako dokumentazio hori bildu.
Jasotako guztiarekin ikus-entzunezko bat osatu nahi dute, “gure arbasoen historia zuzenean ezagutu eta bestalde, gure ondorengoak ere, nola bizi izan zen ezagutzeko aukera izateko”.
Inork testigantzarik emateko balu, edo gertukorik, edo dokumentaziorik, 688 669 426 telefono zenbakira deitzeko eskatu du auzo elkarteak. Bestela, helbide honetara ere idatzi daiteke, edo elkarteko bulegora gerturatu, ostiraletan 17:00etatik 19:00etara.
