Behobia-Donostia lasterketarako izen emate epea hilaren 15ean zabalduko dute
Azaroaren 14an egitekoa da lasterketaren 56. edizioa; osasun egoeragatik atzeratu behar balitz, 2022ko otsailean egingo litzateke 56. edizioa, eta 2022ko azaroan 57.a.
Behobia-Donostia lasterketa antolatzen duen Fortuna Kirol Elkarteak erabaki du hurrengo edizioari ekitea, “lasterketaren antolakuntzak ahal duen guztia egingo du 56. edizioa gauzatzeko”, esan dute. Hala, izena emateko epea hilaren 15ean zabalduko dutela jakinarazi dute. Azaroaren 14an da egitekoa Bidasoa eta Oarsoaldea alderik alde zeharkatzen dituen lasterketa; osasun egoerak hala eskatuta atzeratu beharko balitz, 2022ko otsailera atzeratuko litzateke 56. edizio hori (data zehaztu gabe dago), eta 57.a 2022ko azaroaren 13an egingo litzateke.
2021eko ekainaren 15tik aurrera izen ematea egiteak dakar lasterketaren balizko data aldaketa onartzea. Edozein kasutan, ohiko baja sistema erabiliko da izen ematerako nahiz balizko bajetarako.
Iazko izen ematea aurtengo ediziorako gordea dutenen kasuan, data aldaketa ematen bada, diru itzultzeko edo azaroko ediziorako gordetzeko aukera izango dute.
