'Afrika bi gurpilen gainean noraezean' ikus-entzunezkoa, etzirako proposamena
Ernes Olasagastik Afrikan motozikletan egindako bidaiez gozatzeko aukera izango dute irundarrek ostegunean. Sarrerak gonbidapenarekin eskuratu beharko dira.
Etzi (hilak 27) Amaia Kultur Zentroak ‘Zure abenturaren bila’ programaren beste saio bat eskainiko du. Oraingo honetan Afrika bi gurpilen gainean noraezean izeneko ikus-entzunezkoa proiektatuko dute. Saioan, Ernes Olasagasti egilea bera ere egongo da eta Afrikan motozikletan egindako bidaiez ariko da. 19:30ean hasiko dute emanaldia.
Sarrera doakoa izango da, baina gonbidapenak eskuratu beharko dituzte interesdunek, saioa hasi baino 30 minutu lehenago.
Laburpena:
«Ametsetako bidaia: Afrika motoan gurutzatzea noraezean. Lurmutur Hiritik Europara, etapatan. Hegoafrikatik motoan abiatu eta hiru hilabetean kontinenteko hegoaldean 7.000 kilometro baino gehiago sigi-saga egin, eta Tanzanian utzi genituen, ahal bezain laster bila itzultzeko asmoz. Hegoafrika, Namibia, Botswana, Zambia, Malawi, Mozambike, Tanzania. Paisaia ikusgarriak, sakon sartzen diren usainak, basamortuak, aintzirak, animalia basatiak, desesperatzeko moduko mugak… Batez ere, AFRIKA, letra larritan, eta, nagusiki, jendea».
