Musika eta Dantza Eskola eta Kontserbatorioa, ikasturte berrirako prest
Hilaren 17tik 31era bitarte egin beharko dira izen emateak. Aurten gainera, helduentzako musika hizkuntzako eskolak antolatu eta 4 eta 5 urteko haurrak musikarekin harremanetan jartzeko taldeak sortuko dituzte.
Irungo Musika eta Dantza Eskolak eta Kontserbatorioak dena prest du ikasturte berrirako. Hilaren 17tik 31era bitarte egin beharko dira matrikulazioak, gaur Hezkuntza saileko ordezkari Santi Jimenezek eta ikastegiko zuzendari Amaia Liceagak azaldu duten bezala.
«Lau urtetik gorakoekin egiten dugun lanari esker, kultura eta aisialdia bat egiten dituen jarduera bat eskaintzen diegu txikienei, eta, azkenerako, arrakasta lortzen dugu; adibidez, berriki, Andoaingo piano jaialdian eta Euskadiko Musikari Gazteen Lehiaketan», esan du Jimenezek.
Matrikulazioak udalaren webgunean egin beharko dira. Horretarako, datu pertsonalak eta aurretik dituzten ezaupideak adierazi beharko dituzte interesdunek, baita ere egin nahiko luketen espezialitatea zehaztu.
Aurten, berritasun bezala, helduentzako musika hizkuntzako eskolak eskainiko dituzte. Horrez gain, 4 eta 5 urteko haurrak musikarekin harremanetan jartzeko taldeak ere sortuko dituzte, pop eta rock musikara gerturatzeko.
Musika hezkuntza eta balleta
Eskabide guztiak jaso ostean espezialitatearen eta adinaren arabera sailkatuko dituzte ikasleak. Musika hizkuntzako eta balleteko eskoletan hasteko eskabideen kopurua eskaintzen diren tokiena baino handiagoa bada, jendaurreko zozkera egingo dute.
Ikasleek aurretiko ezaupiderik badute, maila proba bat egingo diete. Adinaren arabera, astean 45 minututik astean bi ordu eta erdira bitarteko klaseak izango dira.
Askotariko instrumentuak
Ikasleek askotariko instrumentuen artean aukeratu dezakete: pianoa, akordeoia, gitarra, teklatu elektronikoa, gitarra eta baxu elektrikoa, biolina, biola, biolontxeloa, kontrabaxua, perkusioa, panderoa, trikitia, txistua, bonbardinoa, zeharkako flauta, klarinetea, saxofoia, oboea, fagota, tronpa, tronpeta, tronboia eta tuba.
Instrumentuen eskolek astean 30 minutuko iraupena izango dute, eta bakarka emango dira. Beraz, ez da beharrezkoa aurreko maila probarik egitea. Alabaina, instrumentu gehienek aurretik ezaupideak izatea eskatzen dute.
Taldeak
Taldetan aritzeko ere instrumentua jotzeko oinarrizko ezaupideak izatea beharrezkoa izango da. Honako hauen artean aukera daiteke: banda, big banda, hari orkestra, akordeoi orkestra, gitarra orkestra, teklatu orkestra, pop-rock tailerra eta trikiti taldea. Uztailaren 2an zerrendak eta ordutegiak argitaratuko dituzte, eta uztailaren 2tik 15era bitarte matrikula berretsi beharko da.
Prezioen xehetasun guztiak, lotura honetan kontsulta daiteke. Udaletik diotenez, Irunen erroldatuak ez daudenak tasa garestiagoa ordaindu beharko dute (%30 gehiago).
