Irungo parkeetan euskaraz gozatzeko gonbidapena egin du Familia Ola programak
Datozen hiru ostiraletan hiriko parke eta plazak euskaraz beteko dituzte haur eta gurasoek. Askotariko jarduerak egingo dituzte 'Parketarrak' izeneko saioetan.
Gain Gainean parkearen itxura berria. Irungo Udaleko Euskara sailak dena prest du Familia Ola programaren hurrengo hitzorduetarako. Datozen hiru ostiraletan (hilaren 14, 21 eta 28a) «hiriko parke eta plazez euskaraz gozatzeko gonbidapena» egin diete guraso eta haurrei, Parketarrak izeneko hiru saio antolatu baitituzte. Askotariko jarduerak prestatu dituzte arratsalde dibertigarria pasa dezaten familiek.
«Programa honek badarama urte batzuk ikasgeletatik kanpo euskara erabil dadin bultzatzeko lanean, askotariko ekimenen bidez. Hain zuzen ere, Parketarrak ekimenaren esparruan, hiri osoan barrena haurrentzat ditugun parke edo jolastokiak baliatzen ditugu, txikienentzako aire zabaleko jarduera ludikoak antolatzeko, euskara dela protagonista», esan du Miren Etxebeste ordezkariak.
Datorren ostiralekoa Jenaro Etxeandian egingo dute; hilaren 21ekoa Gain Gainean eta 28koa berriz, Naggore Laffagen.
Seiko taldetan
Osasun gomendioei jarraituz, hiru saioetan seiko taldeak osatuko dituzte partaideen artean, adinaren arabera. Etxebestek aurreratu duenez, ez da beharrezkoa izango familiek aurrez aldetik izena ematea. Jarduerak 17:30ean eta 19:00etan izango dira.
