Nekea eta haserrea kalera aterako ditu Ernaik, etorkizun duina eraikitzeko
Oarso Bidasoko Ernaik Donostiara deitu du ostiralean, gazteek bizi duten egoera iluna irauli eta etorkizun duina eraikitzeko. Bulebarrean egin dute hitzordua 18:00etan.
Ernairen protesta baten artxiboko irudia. Argazkia: Ernai Nazio mobilizazio eguna antolatu du Ernai gazte antolakundeak ostiralean. Bizi duten egoera latza, prekarietatea eta etorkizun ezak, okerrera egin dute pandemiaren testuinguruan, euren egoera eta bizi eta lan baldintzak jasangaitzak bihurtzeraino. Ez daude prest besoak gurutzatuta gelditzeko, jakin badakitelako, euren egoera salatzea, kalean aldarrikatzea euren eskaerak eta borrokatzea dela bizi duten egoera iluna iraultzeko bidea.
Ostiralean, beraz, herrialdeka aterako dira kalera ehunka gazte Ernaik deituta, merezi eta behar duten etorkizuna aldarri. Oarso Bidasoko Ernaik, Donostiara deitu du. Bulebarretik abiatuko da mobilizazioa 18:00etan. Leloa, honakoa: Larrialdi egoeran gaude. Eraldaketa soziala, burujabetza.
Antolatutako mobilizazioaren aurrean irakurketa egin du gazte antolakundeak, arazoaren tamaina eta gazteek bizi duten egoera egunerokoan agerian jartzeko. Etorkizunik ez dutela salatu du, ezta oraina modu duinean bizitzeko aukerarik ere, “etxebizitza eta enpleguaren problematikak larriagotu egin dira, harremantzea debekatua dugu, gazteen kriminalizazioa, suizidio eta depresio kasuek gora egin dsute azken hilabeteetan gazteen artean…”. Panorama latza, iluna benetan gazteek parez pare dutena eta duin bizi nahi badute behintzat borrokatzea dute aukera bakarra, aldatzea ezartzen ari zaien egoera bidegabea. Bidea zein den ere argi du Ernaik: “Eraldaketa soziala eta burujabetza”.
Ostiraleko protestaren bidez, gazteen aldarrikapenak kalera atera nahi ditu gazte antolakundeak, baita gazteen ezinegon eta prekarizazio prozesu estrukturalei erantzun ere. Bide horretan, ezinbestekoa jo dute gehiengoak artikulatzea, “hori da gakoa eraldaketa sozialean urratsak egiteko; indar horiek, burujabetzaren bidean jartzea dagokigu”.
Antolakuntza eta borroken artikulazioa dira tresna nagusiak antolakundearen esanetan, “datorrenaren aurrean antolatu eta kapitalaren ofentsibaren aurrean elkarrekin ekiteko prestatzea dagokigu, antolakuntza da bide bakarra”.
Etorkizun eza eta orain duin baten faltan, bizitza duintzeko aterako dira ostiralean kalera ehunka gazte, eta mobilizazioan parte hartzera deitu ditu Oarso Bidasoko Ernaik, Errenteria-Orereta, Pasaia, Oiartzun, Lezo, Irun eta Hondarribiko gazte guztiak, etorkizuna ez ezik, oraina ere jokoan dutelako eta badakitelako euren esku dagoela hori irauli eta gazteak duin biziko diren agertoki berria eraikitzea.
