[Bideoa eta galeria] Aldaketaren alde mobilizatu dira langileak LABen eskutik
Bidasoa eta Oarsoaldeko ehunka herritarrek Errenteria-Oreretako kaleak bete dituzte langileek pairatutako prekarietatea salatu eta aldaketarako garaia dela aldarrikatuz.
2021eko Maiatzaren Leheneko manifestazioa Oarso Bidasoko LAB sindikatuak deituta.
Kaleak hartu dituzte beste urte batez langileek Maiatzaren Lehenean. Manifestazio erraldoien iruditik urruti, indarrean dauden osasun neurriek eskualdez eskualde mobilizatzera behartu dituzte sindikatuak eta beharginak. Horrek, hala ere, ez ditu protestak eten, eta Errenteria-Oreretan ehunka lagunek erantzun diote Oarso Bidasoko LAB sindikatuak egindako deialdiari.
Aldaketa da aukera. Zaintza, lana, bizitza, herria! lelopean, eguerdiko 12:00etan ekin diote mobilizazioari Matxaingo biribilgunetik. Hiru zutabek osatu dute martxa nagusia: zaintzaileak, gazteak eta pentsiodunak. Hala ere, euskal presoek eta euren senideek, osasun langileek eta feministek protagonismo berezia jaso dute ibilbidean zehar. Nafarroa etorbidea eta Iztieta auzoa zeharkatu dituzte manifestariek, eta Alabergako biribilgunean buelta eman dute berriz ere Zumardirantz abiatzeko. Agirre Lehendakariaren plazan burutu dute ekitaldi nagusia.
Ekitaldia
Manifestazioa bukatuta LABeko militanteen artean zaintzaileek hartu dute hitza lehenbizi. Argi mintzatu dira zaintzak bizi duen egoera prekarioaz, eta sektorea publiko izatearen beharra nabarmendu dute. Gazteen txanda iritsi da ondoren. Aernnova, Tubacex eta bestelako enpresen egoera hizpide izan dute, eta sistemari zein egoerari erreparatuta etorkizun iluna dutela deitoratu dute. Hala ere, borrokarako prest daudela argi utzi dute: «Lehen lerroan egon behar dugu».
Pentsiodunek beste behin ere goratu dute ahotsa hitza hartu dutenean. Hirugarren urtez, astelehenero, protestak egiten jarraitzen dutela gogoratu dute, eta pentsio duinak aldarrikatu dituzte berriro. Jubilatuek diskurtsoa bukatuta, euskal presoen senideei omenaldia eskaini nahi izan diete han bildutakoek.
Azkenik, Kris Gete Oarso Bidasoko LABeko arduradunak hartu du hitza. Lehenik eta behin, «bertan egon ezin duten» euskal presoei besarkadarik «beroena» bidali die, eta iaz, lan istripuetan hildako langileak izan ditu ondoren gogoan: 75. «Aurten, jada, hemezortzi hil egin dizkigute, eta oraindik desagertuta duten Joakin Beltran falta da», erantsi du.
Arduradunak jarraitu duenez, «osasun krisiak lehendik zetorren krisi ekonomiko eta soziala besterik ez du egin. Aldaketa saihestezina da, eta erabat beharrezkoa ere». Honek guztiak mobilizazio «handiagoetarantz» eraman behar dituela beharginen protestak adierazi du. «Ez gaude amore emateko, borrokarako indarra dugu», amaitu du ordezkariak.
Ondokoa da goizak utzitako irudi sorta eta ekitaldiko bideoa.
