Podium bikoitza BATeko kirolarientzat
Mutilek taldekako bigarren postua eskuratu dute Donostian jokatutako aire zabaleko Euskadiko Txapelketan, eta emakumeek aldiz, hirugarrena.
Iker Arozenak 7,61 metroko saltoa egin zuen asteburuan. BATeko neska-mutilek asteburu oparoa izan dute. Donostian izan dira, aire zabaleko Euskadiko Txapelketa jokatu dute bertan kirolari bidasoarrek, emaitza onekin gainera.
Emaitzei dagokionez, taldekako sailkapenean podiumaren sartzea lortu zuten mutilek, lehia bizia izan zuten Durango eta Atletico San Sebastian taldeekin eta azkenean bigarren postuan sailkatzea lortu zuten. Iker Arozena izan zen klubeko onena; 7,61 metroko saltoarekin (luzerako saltoan) bere marka pertsonal berria ezarri du, baina tamalez, Europako 23 urte azpikoen txapelketaren txartelerako bederatzi zentimetrora geratu da. Lehen postua eskuratzen ere lagundu zuen Tirso Ocañak, 100 metroetan, 10,80 segundoko markarekin. Iñigo Zarandona ere oso fin aritu zen, disko jaurtiketa proban 39,25 metroko jaurtiketa egin baitzuen.
Neskek aldiz, taldekakoen podiumeko hirugarren postua eskuratu zuten. Nabarmentzekoa izan zen Paula Añorga pertikako saltoan egindakoa; 3,40 metroko saltoa egin zuen.
