Energia jasangarritasunaren arloan, hitzarmena sinatu dute Bidasoa Bizirik-ek eta aldundiak
Helburua eskualdeko ekintza plana martxan jartzea izango da. Era berean, beste eskualdeekin eta aldundiarekin koordinatuko dira plan bateratu bat aurrera eramateko.
Bidasoa Bizirik-ek eta aldundiak hitzarmena sinatu dute energia jasangarritasunaren arloan. Bidasoa Bizirik eta Gipuzkoako Foru Aldundiak hitzarmen bat sinatu dute energia arloan eskualde gisa plangintza bat osatu eta ekintza plan bat martxan jartzeko. Zehazki, energia jasangarritasunaren arloa landuko dute. Hala nola, energia eraginkortasuna; energia berriztagarrien ezarpena; eta pobrezia energetikoaren eta zaurgarritasunaren kontrako borroka.
Horretarako, Bidasoko Energiaren Eskualdeko Mahaia osatu, koordinatu eta dinamizatuko dutela aurreratu du Miguel Angel Paez Bidasoa Bizirik-eko presidenteak. Mahai hori, era berean, Gipuzkoako Energia Jasangarri eta Pobrezia Energetikoko Mahaiaren barruan egongo da. Lurralde mailako mahaiaren bidez, eskualdeko mahaiak koordinatuko dira, aldundiarekin batera estrategia bateratu bat aurrera emateko.
Hitzarmenaren bidez, herritarrei informazioa helarazi eta sentsibilizatzeko ekintzak aurrera eramateko konpromisoa hartu du aldundiak, baita natura ondarea babesteko ingurumen irizpideak bildu eta defendatzeko ere. Azkenik, irizpide sozialak jasoko dituela esan du, energia oinarrizko eskubide gisa onartu ahal izateko.
Aldundiko Ingurumen sailaren arabera, azken urteetan hainbat prebentzio neurri hartu dituzte pobrezia eta zaurgarritasun energetikoaren kalteak arintzeko. “Energia oinarrizko ondasuna dela kontuan hartuta, energiarako sarbidea beste baldintza batzuetan eman beharko litzateke, egungo energia ereduarekin alderatuta”, adierazi du aldundiak.
Horrez gain, negutegi efektuko gasen isurketa murrizteko plan estrategiko bat martxan jarri duela jakinarazi du aldundiak: Klima Aldaketaren Kontrako 2050 plana. Aldundiaren arabera, eredu hori karbono isuri baxuan oinarritutakoa izan behar du, hornidura bermatuko duena, eta lehiakorra eta jasangarria.
Egungo energia sistema aldatu, eta karbono isuri baxuko energia eredu baterako trantsizioa bultzatu behar dela gaineratu du, eta horretarako, tokian tokiko edo eskualdeko planak beharrezkotzat jo ditu.
