Gipuzkoako Herri Arteko Txapelketan izango dira Hondarribiko puntistak
Datorren astean egingo du federazioak taldeen arteko norgehiagokak erabakitzeko zozketa; telematikoki egingo dute ekitaldia aurten.
Gipuzkoako Euskal Pilota Federazioak (GEPF) ezagutarazi ditu Gipuzkoako Herri Arteko Txapelketan parte hartuko duten taldeak eta modalitateak. Denera, hamasei herrik eman dute izena eskuko lehian, hemezortzi lehiatuko dira gomazko paletan, zazpi larruzko paleta eta pala motzean, eta lau zesta-puntan. Azken horretan parte hartuko dute Hondarribiko puntistek, federazioak adierazi duenez.
Datorren astean egingo dute zozketa, baina pandemia medio, aurtengoan ekitaldirik ez egitea erabaki dute eta telematikoa izango da bilera.
