Kale garbitzaileek protesta egingo dute gaur
Hondarribiko eta Irungo kale garbitzaileek euren lan baldintzak hobetzeko eskatuko diete Txinzer eta FCCri, 18:30etatik aurrera, San Juan plazan.
Txinzerreko langile bat hondakinen edukiontziak garbitzen. Hondarribia eta Irungo kale garbitzaileak euren lan baldintzak hobetzeko mobilizatzen hasiko dira, eta, gaur, 18:30ean, elkarretaratzea egingo dute San Juan plazan, ELA, LAB eta UGT sindikatuek deituta. Sindikatuek salatu dutenez, urtetik urtera euren egoera “kaxkartuz” joan da. “Kolektiboaren arazo handienek kontziliazioarekin eta barne promozioarekin dute zerikusi zuzena”, gaineratu dute.
Txingudiko Mankomunitateak kale garbiketaren zerbitzua azpikontratatua dio FCC Medio Ambienteri, eta 150 langile inguruk osatzen dute lan taldea. Maddi Aspiazu Iturbe ELAko arduradunak biak egin ditu egoeraren erantzule, batak kontratatua duen zerbitzua ongi betearazten den kontrola daukan neurrian, eta, bestea, langileen arduradun zuzena den heinean.
Ildo horretatik, Txingudiko Mankomunitateko presidenteari bilera eskatu diote sindikatuek, egoeraren gainean erantzunak bilatzeko, baina, oraindik, ez dute erantzunik jaso. FCCrekin bi urte daramatzate elkarrizketetan, eta aurrerapausoak “oso poliki” doazela gaineratu du Aspiazuk: “Barne promozioan lanpostu asko daude atera beharko liratekeenak, eta datozen urteetan ere erretiro ugari izango dira”. Zentzu horretan, gaia “lehen lerroan” jarri behar dela iritzi dio.
