AEK babesteko ekitaldiak igandean Hondarribian eta Irunen
Bi ekitaldiak 12:00etan hasiko dira, Hondarribikoa Kasino Zaharrean eta Irungoa San Juan plazan. AEK babesteko eskatu dute.
AEK-k Bultza euskaltegiak! Euskara! dinamika abiatu du. Dinamikaren ardatzak hiru dira: administrazioaren eta eragileen inplikazioa; herrietan ekitaldiak egitea; eta AEKren aldeko babes ekonomikoa eskatzea. Izan ere, aurten Korrika ez egitea oso kaltegarria da AEK euskaltegientzat, eta hori iraultzeko abiatu dute dinamika: «Korrikaren atzerapenak hutsunea sortu du. Kolpe ekonomiko handia ekarri digu, eta euskaltegi sendoak behar ditugu».
Horren harira etzi Hondarribian, Irunen eta Errenteria-Oreretan ekitaldiak antolatu dituzte Oarso Bidasoko AEK euskaltegietako arduradunek. Horrez gain, HITZAk gaiari buruzko gehigarri berezia publikatu du martxoaren 26ko astekarian. Sakatu hemen deskarga egiteko (PDF artxiboa da).
Hondarribiko eta Irungo ekitaldiak
Hondarribiko ekitaldia etziko (igandea) 12:00etan hasiko da, Kasino Zaharrean. Euskal Herrian egingo diren beste ekitaldien antzera, bertsolari batek hasiko du: Irati Alcantarillak hartuko du ardura hori. Ondoren, The Iiingles taldeko kideek Euskal Herrian euskaraz abestiaren bertsio berezia egingo dute. Ekitaldia bitartean, Itsaso Labari eta Amaiur Calbete artistek graffitia egingo dute. Ekitaldia hasi bezala bukatuko da, Irati Alcantarillaren bertsoekin. Talde argazkia ateratzeko aukera izango da.
Irungo ekitaldia 12:00etan da ere bai, San Juan plazan. Bertsolari batek eta arpa jotzaile batek egingo diete harrera partaideei, Aitor Errazkinek eta Maddi Sanzek hain zuzen ere. Ez da faltako Euskal Herrian euskaraz abestiaren bertsiorik, Irungo kasuan Mattinek (trikia) eta Larraitzek (panderoa) joko dutelarik. San Juan plazako ekitaldian Cristina Juanizek murala egingo du, elementu komuna baita AEK-k Euskal Herrian antolatu dituen ekitaldi guztietan. Talde argazkia ez da faltako.
AEKtik adierazi dute aurten ere kalean nahi dutela euskararen lekukoa eta euskaltegien aldeko bultzada. Horri begira, haien webgunean diru ekarpena egiteko bidea jarri dute euren webgunean.
