Ostiralean Zabaltza plaza hartzera deitu du Etxerat-ek
Hileko azken ostirala izanik, ohiko elkarretaratzea egingo dute. Euskal presoen lekualdaketak eta hurbilketak berraztertzea eskatuko dute, «presoen eta haien senideen kezka eta ziurgabetasunarekin behingoz amaitzeko».
Datorren ostirala (hilak 28) hileko azkena izanik, berriro Zabaltza plazan elkartzera deitu ditu herritarrak Irungo Etxerat-ek. Euskal presoei elkartasuna adieraziko diete 20:00etatik aurrera. Hilabetero bezala, euskal presoen lekualdaketak eta hurbilketak berraztertzea eskatuko dute, «presoen eta haien senideen kezka eta ziurgabetasunarekin behingoz amaitzeko».
Bide batez, Bidasoko Sarek ostiralerako antolatutako manifestazioan parte hartzera gonbidatu ditu herritarrak Etxerat-ek. Bera eta Olaizola euskal preso irundarrek espetxean jada 20 urte daramatzatela salatuko dute.
