«Pertsona guztiekiko atsegina, kohesionatua eta errespetuzkoa» den hiria nahi du EAJk
Joan den osoko bilkuran erretiratu behar izan zuten arren, hurrengo kreditu aldaketan hiria dibertsitate funtzionala duten pertsonei egokitzeko azterlan bat eskatuko dute.
Irungo EAJ taldeak joan den asteartean osoko bilkuran onartutako aurrekontuen gaineko balorazioa egin du gaur. 63 zuzenketa aurkeztu zituzten bilkura horretan, besteak beste, «Irun, gure hiria, dibertsitate funtzionala duten pertsonei egokitzeko azterlan bat» egiteko proposamena egin zuten jeltzaleek, baina egungo egoeragatik erretiratzea erabaki zuten. Halere, hurrengo kreditu aldaketan berriro aurkeztuko dutela aurreratu du Xabier Iridoy bozeramaileak.
Gaurko agerraldian gaineratu dutenez, hiria «irisgarritasun unibertsalaren» ikuspegitik planifikatzeko beharra ikusten du EAJk, eta horregatik funtsezkotzat jo dute «herritarren aniztasunetan» pentsatzen hastea, dibertsitate funtzionala, kognitiboa, sentsoriala eta kulturala kontuan hartuta. Zentzu horretan, espaloien beheratzeetan eta oztopo arkitektonikoen egokitzapenean aurrera pausoak eman behar direla uste dute jeltzaleek, «hiria pertsona guztien beharretara egokitu ahal izateko».
Horregatik «gure esku dauden foroetan» azterlan hori egiteko eskaera egingo dutela diote, jakiteko «noraino den inklusiboa hiria». Bestalde, bestelako ekintza batzuen artean honako egitasmoak bultzatu nahi dituzte: irakurketa erraza sustatzea, testuak egokitzeko eta idazteko metodoak garatzea, irakurtzeko desgaitasuna duten pertsonei informazioa eta kultura eskuragarri egitea, aukeratzeko estrategia kognitiboa erraztea edo piktogramekin seinaleak egokitzea.
«Izan ere irisgarritasunaz. eskubideaz, hiri inklusiboagoa eta irisgarriagoa egiteaz, berdintasunez eta parte hartzeko aukera berberak izateaz ari gara. Eta horri heltzeko, eguneroko jarduna errazteko, eta gure hiriko pertsona guztiei oztoporik gabeko parte hartzea sustatzeko unea dela iruditzen zaigu. Irun pertsona guztiekiko atsegina, kohesionatua eta errespetuzkoa izan dadin».
