Bide publikoaren okupazioagatik aurten ere ez du zergarik kobratuko du udalak
Erabateko hobaria onartu zuen iragan astean Hondarribiko Udalbatzak. Horrekin batera, etxez etxeko laguntza zerbitzua, Martxoak 8 plazaren izendapena eta hainbat mozio ere onartu zituen.
Ostegunean bildu zen, 2021. urtean lehen aldiz, Hondarribiko Udalbatza ohiko osoko bilkuran. Ia lau orduz luzatu zen plenoa, eta hartutako erabakien artean nabarmendu zutenez, bide publikoaren okupazioagatik erabateko hobaria aplikatzea aho batez onartu zuten udal taldeek. Bigarren urtez jarraian hartutako erabakia da.
Horrez gain, etxez etxeko laguntza zerbitzua kontratatzeko plegua onartu zuen udalbatzak, baita horren prezioa arautzen duen ordenantza baietsi ere. EAJren, Abotsanitzen eta EH Bilduren aldeko botoekin onartu zuten. PSE-EEk, bere aldetik, “kasuistiken araberako azterketa konparatiboa” falta zela iritzita abstentziora jo zuen.
Bi aste lehenago iragarri bezala, bestalde, Bernat Etxepare eta San Pedro kaleen arteko enparantza Martxoak 8 plaza izendatzea ere aho batez onartu zuen udalbatzak.
Mozioak
Eguneko aztergaien bukaeran zehaztu ohi diren mozioen artean, Hego eta Ipar Euskal Herriko pasabideak berriro zabaltzeko EH Bilduk egindako proposamenak Abotsanitzen eta EAJren aldeko botoekin aurrera egin zuen.
Amuitz merkatarien elkarteko Sonia Hercek, bere aldetik, Amazonek Oiartzunen gune logistikoa ezartzearen aurkako mozioa irakurri zuen. Proposamenak alderdi guztien babesa jasotzeaz gain, “saltoki txikiak babesten eta indartzen jarraitzera” deitu zuen udala.
Udalbatzak onartu zuen, halaber, Abotsanitzek Harrera programari buruz aurkeztutako mozioa. Horren arabera, programa garatzeko ezinbesteko baliabideak eskura jartzeko konpromisoa hartu du Hondarribiko Udalak.