Irungo ostalariek indarrak batu dituzte, Denok Bat elkartean
Elkartean erdiguneko zein auzoetako taberna, jatetxe, kafetegi, hotel eta gaueko aisialdi guneak bildu dituzte, «Iparraldeko bezeroak berreskuratzeko, eta tokiko kontsumoa bultzatzeko» asmoz.
Atzoko agerraldiaren irudia. Argazkia: Koldo Nausia. Pandemiak eragindako krisiari aurre egiteko hiriko ostalariek indarrak batu dituzte. Ostalaritza elkarte berri bat osatu dute Irunen, Denok bat izeneko taldea aurkeztu zuten atzo Kale Nagusian Irungo tabernari eta jatetxeetako zenbait kidek.
«Elkartean erdiguneko zein auzoetako taberna, jatetxe, kafetegi, hotel eta hain ahaztuta dagoen gaueko aisialdia bildu nahi ditugu. Irun hiri dinamikoa bilakatu nahi dugu, Iparraldeko bezeroak berreskuratzeko, eta tokiko kontsumoa bultzatzeko», esan zuen atzo Eneko Mitxelena, Don Jabugo tabernako jabeak. Urtean hiru-lau ekitaldi handi eta maiz ekitaldi txikiagoak egitea aurreikusi dute, hori bai, egungo egoerak baimentzen duenean noski.
Irungo ostalarien eta udalaren arteko hartu emana erraztuko du elkarte berriak. Atzoko agerraldian Junkal Eizagirre ordezkaria izan zen. «Ez ditugu arazo guztien irtenbideak, baina lanean jarraitzeko borondatea dugu, orain arte bezala laguntzen jarraitu eta herritarren artean pedagogia eginez», esan zuen.
