Irundarra Kirol Sarien irabazleak dira Teresa Errandonea, Julen Aginagalde eta Leka Enea Mahai Tenisa elkartea
Lehiaketa asko bertan behera utzi behar izan ziren arren, 2020an egon dira garaipenak eta hortaz, Irundarra Kirol Sariak banatu dituzte.
Leka Enea Mahai Tenis elkarteko ordezkariek jaso dute Klub Onenaren saria. Joan den urtean lehiaketa gehienak bertan behera gelditu ziren arren, saridunak nortzuk diren erabakitzeko jokatu ahal izan diren lehiaketa eta garaipenak kontuan hartu dituztela azaldu dute sailetik.
Sari banaketa atzeratu den arren, Irundarra Kirol Sariak 2020 banatu dituzte. Borja Olazabal Kiroletako zinegotziak “Urte konplexu honetan taldeek eta kirolariek egindako lana” aldarrikatu du. Saria irabazle bakoitzari banan banan eman diote, eta guztira hiru talde eta kirolari dira irabazleak:
Emakumezkoen kategoriako Kirolari Onenaren saria Teresa Errandonea atletak irabazi du laugarren aldiz: 60 metroko hesi-denbora guztietako hirugarren marka onenarekin, pista estaliko Espainiako Txapelketan urrezko dominarekin eta Euskadiko errekorra betez. “Urte zaila izan zen iazkoa bizitzen ari garen guztiagatik eta sari hau jasotzeaz harro eta eskertuta sentitzen naiz” esan du Errandoneak.
Gizonezkoen kategoriako Kirolari Onenaren saria Julen Aginagalde eskubaloi jokalariak jaso du, Europako Selekzioen garailea izateagatik.”Etxetik jasotzen ditudan aitorpenak dira gehien eskertzen ditudanak” nabarmendu du Aginagaldek.
Klub Onenaren saria Leka Enea Mahai Tenisa elkarteak eskuratu du, Endika Perezek Gizonezkoen Txapeldunen Ligan parte hartu duelako. Elkarteko zuzendaria den Josema Zuazuak garaikurra jasotzeaz “harro” daudela aitortu du.
Beste urte batez, Irundarron Saria ere banatu da, eta hiritarrek 399 bozekin Teresa Errandoneari ematea erabaki dute.
Efemerideak eta urteurrenak gogoratzeko sortu zuten aitorpen berezia Bidasoa 94-95ri egin diote, duela 25 urteko denboraldi horretan irabazi zuten Europako Koparengatik. Garai hartako zuzendaritzako kide ziren Fernando Morondo eta Jose Luis Muñozek, eta klubeko presidentea zen Beñardo Garciak jaso dute saria. Presidente zenak “Bidasoaren parte diren eta izan diren guztiak” ekarri nahi izan ditu gogora eta bere esanetan “Klubak aurrera jarrai dezala” desio du “berriz Artalekun dagoen sugarrak bizirik jarrai beza” erantsi du.
