Jaizubian jokatzekoa zen Gipuzkoako Jauzi Txapelketa atzeratu dute
Asteburu honetan jokatzekoa zen txapelketa atzeratzea erabaki dute antolatzaileek, «kontuan hartuta osasun publikoa gailendu behar dela beste ezeren gainetik».
Asteburu honetan Irungo Jaizubia Hipikan jokatzekoa zen Gipuzkoako Jauzi Txapelketa atzeratzea erabaki dute antolatzaileek, «COVID-19aren pandemia eta herritarrak gaur egun jasaten ari diren osasun egoera dela eta, eta kontuan hartuta osasun publikoa gailendu behar dela beste ezeren gainetik».
«Gizarte gisa arduratsuak izan behar dugu ahalik eta azkarren garai hobeak etor daitezen. Guztion lana eskertzen dugu, eta kirolariak eta klubak animatzen ditugu hilabete hauetako lan onarekin jarraitzera», esan dute Irungo klubetik.
Oraindik datarik ez dute zehaztu antolatzaileek. Hitzordua zehaztu bezain laster horren berri emango du HITZAk.
