Bertako saltokietan erosteko sentsibilizazio kanpaina abiatu dute
Hondarribian bertan kontsumitzea da kanpainaren helburua. Fan Fan Fan Challenge lehiaketa ere abiatu dute udalak eta Amuitzek.
Gabonetan herritarrak Hondarribiko komertzioetan kontsumitzera animatzeko asmoz, sentsibilizazio kanpaina berezia abiatu dute Amuitz merkatarien elkarteak eta udalak. Hainbat ikus-entzunezko ekoitzi dituzte horretarako, eta orain, Interneten eta sare sozialetan horiei hedapena ematea da helburua.
Horrez gain, Fan Fan Fan Challenge izenpeko txapelketa martxan jarri dute merkatariek eta tokiko gobernuak. Lehiaketa herritarrei zuzenduta dago, eta Hondarribiko saltoki batean bideo bat grabatzean datza. Sorkuntza lana ondoko helbide elektronikora bidali beharko dute parte hartzaileek hilaren 29a baino lehen. Hurrengo egunean ezagutaraziko du merkatariek osatutako epaimahaiak zeintzuk diren hiru irabazleak, eta egun horretan bertan, Hondarribian gastatzeko kontsumo txekeak banatuko zaizkie: 1.000 euro lehenarentzat, 600 euro bigarrenarentzat eta 400 euro hirugarrenarentzat.
Maria Serrano Merkataritza eta Sustapen Ekonomikorako zinegotziak gogoratu duenez, Gabonetako X. Erakusleiho lehiaketa eta kontsumo bonuak oraindik ere martxan dira. Sonia Herce Amuitzeko ordezkariak bere aldetik, «positibotzat» jo ditu kontsumoa bultzatzeko martxan jarritako dinamika ezberdinak.