Mendeluko «inbuturako» konponbide bat galdegin du Abotsanitzek Aldundian
Auzoa gurutzatzen duen N-638 errepidearen gaineko hainbat eskari helarazi dizkiete alderdiko ordezkariek Bide Azpiegituretako Departamentuko teknikariei.
Mendelu eta Amute auzoak lotzen dituen N-638 errepidearen gaineko hainbat eskari helarazi dizkio Abotsanitz Herri Batzarrak Gipuzkoako Foru Aldundiko Bide Azpiegituretako Departamentuari. Igor Enparan alderdiko bozeramaileak eta Lupe Queiruga hautetsiak auzoak aspalditik azaleratutako «inbutuaren» problematika mahaigaineratu zuten foru erakundean atzokoan. Gaia Diputazioaren agendan sartzea da helburua.
Abotsanitzek Aldundian planteatutako argudioen artean, besteak beste, errepideak «auzoa bitan» banatzen duela eta ondorioz, «segurtasun eza nabarmena» dela adierazi zuen, «batez ere oinezko eta erabiltzaileen aldetik». Horrez gain, «nahi baino ibilgailu askoz gehiagok zeharkatzen dute errepide zati hori, arrisku sentsazioa are eta gehiago handituz». Horren eraginez, «gas emisio eta zarata handia pairatzen dute» auzotarrek.
Hori horrela, Amuteko eta Mendeluko auzo elkarteen zein Balaztaren iritzia bildu eta hori oinarritzat hartu ondoren, ondokoa galdegin dio Abotsanitzek Aldundiari:
- Orduko 30 kilometroko muga ezartzea.
- Errepidearen zabalera abiadura horretara egokitzea.
- Bizikletentzako bidegorria behin-behinean ezartzea (hirigintza garapena gauzatu bitartean).
- Mendeluko autobus geltokiaren inguruko mantenu lanak egitea.
- Amuteko zubiko mantenua burutzea.
Foru Aldundiko teknikariek idatziz erantzungo dietela Abotsanitzen eskariei azaldu du udal alderdiak, eta datozen egunotan, elkarteetako ordezkari ezberdinekin bilduko direla bileraren nondik norakoen berri emateko erantsi dute. Azkenik, Aldundiari helarazitako eskarien kopia bana gainontzeko udal alderdien eskura jarri dutela bukatu du herri batzarrak.