Erribera inguruko erreka garbitzen eta drainatzen ari dira
Alboetan zegoen lohia mugitu eta kendu egin dutela argitu dute. Era honetan, Puntalean eta aireportuan itsasoratzen den ura irisgarriagoa da eta baratzetako uholdeak gutxitzen dira.
Juan Luis Sillanes zinegotziak azken urteetan martxan dabilen erreken mantentze proiektuaz hitz egin du gaur eman diren agerraldian. Aurten, esaterako, 5.000 euroko aurrekontua eduki dute drainatze lanek.
Zinegotziak azaldu duenez, Erribera inguruko erreka ertzean pilatzen den lokatza kendu eta mugitu dute. Horretarako hondeatzaileak erabili direla argitu du. Izan ere, garbiketa hau egin ezean, ura ez da behar bezala itsasoratzen Puntala eta aireportu inguruan, eta bertako baratzeek uholdeak jasaten dituzte.
Bizilagunen jarrera positiboa nabarmendu nahi izan du zinegotziak. Bere hitzetan udalak egindako lana da, “baina bizilagun eta jabeen oniritzia izan du, beraiek baitute bere sailak mantentzeko ardura”. Garai batean egiten zen bezala, pajina bidez mantentzera animatu nahi izan ditu herritarrak.