2021eko udal egutegia apaintzeko «bizitzaz betetako argazki» bila dabil udala
Irundarren argazkiekin osatuko dute datorren urteko egutegia. Jasotako guztietatik hamahiru aukeratuko dituzte, hileko bana eta portada.
Irudi jendetsu eta koloretsuak nahi dituzte. Irungo Udala eta Irungo Argazkilaritza Elkartea jada 2021ko udal egutegiari begira jarri dira. Hiritarrekin argazkiekin osatu nahi dute hurrengo urtekoa, eta horretarako, «bizitzaz betetako argazkiak» eskatu dizkiete irundarrei.
Jasotako guztietatik, hamahiru argazki aukeratuko dituzte, hil bakoitzeko bana eta portada. Udaleko webgunean eremu berezia sortuko dute bihartik aurrera, bertan argazkiak bidaltzeko. Azaroaren 16a izango da bidaltzeko azken eguna.
Aurkeztutako argazkiak originala beharko du izan, eta ez dituzte bestelako lehiaketetan aurkeztutakoak onartuko. JPG formatuan entregatu beharko dira, 30×20 zentimetroko tamainan. Esteka honetan egin daitezke bidalketak. Irundar bakoitzak gehienez hiru argazki aurkeztu ahal izango ditu.
