Milioi bat euroko salmentarekin amaitu dute aurtengo Caravantur azoka
Hiru egunez autokarabanak eta landazabalak saltzeko hogei eragiketa baino gehiago egin dituzte. Erakusketariek ere «oso positibotzat» jo dute aurtengo edizioa.
Asteburuko irudi bat. Asteburuan Ficobak jasotako Caravantur azokaren gaineko balorazioa egin berri dute antolatzaileek. Datuei erreparatuta, hiru egunez, autokarabanak eta landazabalak saltzeko hogei eragiketa baino gehiago sinatu dituzte, milioi bat euro inguruko balioarekin. «Caravantur 2020k agerian utzi du euskal publikoak caravaning sektorearekiko duen interesa».
Alokairu eragiketen behin betiko datuak ezagutu bitartean, ondorioztatu dute gero eta gehiago direla modalitate hori bidaiatzeko aukeratzen dutenak. Era berean, erakusketariek ere «oso positibotzat» jo dute aurtengo edizio berezia, izan ere, «Ficobako pabiloietan caravaning eskaintza zabalaz gozatu ahal izan dute bisitariek».
