Asobal ligako laugarren partida ere poltsikora
Zortzitik zortzi puntu eskuratu ditu Bidasoa eskubaloi taldeak. Atzo Nava taldea gailendu zuten irundarrek, 28-21.
Sei gol eskuratu zituen atzo Aginagaldek, orain arteko partidarik onena. Europako ametsik gabe geratu arren, Asobal liga ezin hobeto hasi duela erakutsi du berriz ere Bidasoa eskubaloi taldeak. 28-21 irabazi zioten atzo Nava taldeari, denboraldiko laugarren garaipena izan zen, lauak jarraian irabazi dituzte gainera.
Hasieratik partidaren agintea irundarrek izan zuten, zalantzarik gabe, atsedenaldira hiru goleko abantailarekin iritsi ziren. Bigarren zatia ere Bidasoak gidatu zuen, amaierako 7 goleko abantaila ezarriz. Nabarmentzekoa Julen Aginagalderen partida, iritsi zenetik jokatutako partida onena izan zen atzokoa; sei gol eskuratu zituen. Bestalde, Jose Manuel Sierrak 14 geldiketa ikusgarri egin zituen, beharrezkoa amaierako markagailua ezartzeko.
Garaipen honekin hirugarren postuan jarraitzen du Bidasoak, 8 punturekin, Ademar Leon eta Bartzelonaren atzetik.
Fitxa teknikoa: 28 – Bidasoa Irun: Sierra; Racotea (2), Zabala, Odriozola (2, 1 pen.), Serrano (4), Salinas (4), De la Salud (2, 1 pen.); Cavero (3), Crowley (2), Aginagalde (6, 1 pen.), Urruzola (1), Tesoriere, Matheus da Silva (1), Nieto (1 pen.), Bonanno.
