Lekeitioko bandera Hondarribira ekarri dute berdeek
Larunbatean Bilbon seigarren postua eskuratu ondoren, bandera irabaztea lortu zuen atzo gizonen eskifaiak Lekeition. Emakumeen ontzia azken postuan sailkatu da bi estropadetan.
Ama Guadalupekoa eskifaia Lekeitioko bandera jasotzen. 
Hondarribia Arraun Elkarteko gizonen eskifaiak XXXV El Correo Ikurriña – Kutxabank Sari Nagusia – Lekeitioko Udala bandera irabazi zuen atzo Bizkaiko uretan. Hiru segundoko zigorra jaso arren, 20:06,14 marka lortuta lehen postuan sailkatu zen atzo Ama Guadalupekoa, Urdaibai eta Donostiarra izan ziren bigarren eta hirugarren, hurrenez hurren.
Emakumeen IX. Euskotren Banderari dagokionez, Hondarribia azkena sailkatu zen 11:15,28 denborarekin Oriok eta Donostiarrak markatutako erritmoari ezin eutsi. Horiak sartu ziren lehenak 10:50,76 marka eginda. Koronabirus kasu bat medio Donostiako Arraun Lagunak ontziak ezin izan du asteburuko estropadetan parte hartu.
Larunbatean bestalde, Bilboko bandera jokatu zuten bi ligetako arraunlariek. Hondarribiko emakumeak azken postua eskuratu zuen Bizkaiko hiriburuko bigarren banderan 11:07,66 marka lortuta. Gizonek aldiz, seigarren lekua bete zuten 19:55,12 denborarekin Bilboko XI. Banderan.
Urdaibai da nagusi gizonen sailkapen orokorrean eta Orio emakumeen artean. Datorren asteburuan ez da Euskotren eta Eusko Label Ligetako jardunaldirik izango Espainiako txapelketaren txanda baita, eta datorren norgehiagoka etxeko uretan jokatzeko aukera izango dute Ama Guadalupekoa ontziek.
B trainerua
700. Errenteriako Udala Bandera irabazteko Oarsoaldeko uretan lehiatu da asteburuan gizonen bigarren ontzia. 20:46,94 denbora eginda lehen postuan sailkatu ziren hondarribiarrak, Castrotik lau segundora eta Lapurditik bostera. Sailkapen orokorraren hirugarren postuan kokatuta dago Hondarribiko trainerua.
