Espero zena bete da Hondarribian, EAJ nabarmen izan da garaile
Espero zena bete da Hondarribian, EAJ nabarmen izan da garaile. Bigarren indarra EH Bildu izan da, eta hirugarrena PSE-EE. Bi alderdi horiek hazkunde nabarmena izan dute.
Herritarrak, Jostaldira botoa ematera sartzen. Argazkia: Hondarribiko Udala. EAJ izan da gaur, Eusko Legebiltzarrerako hauteskundeetan, botorik gehien lortu duen alderdia Hondarribian. Mahaietan jaso diren boz guztien %48 pasatxo jaso du; 2016ko hauteskundeen ehuneko berbera, alegia. Abstentzioa herrian %45ekoa izan da, 2016an baino sei puntu handiagoa. Beraz, EAJk duela lau urteko botoen ehuneko berbera jaso arren, horien kopuruan behera egin du.
Bigarren indarra EH Bildu izan da, botoen ia %26rekin; 2016an boto paperen %20 jaso zuen, beraz, hazkundea izan du boto emaileen ehunekoaren aldetik, baita bozen zenbatekoan ere nahiz eta abstentzioa nabarmen handiagoa izan. Aldaketa hirugarren indarrean: gaurko hauteskundeetan PSE-EE izan da hirugarrena, eta Elkarrekin-Podemos laugarrena. Alderdi morearen presentzia ia erdira jaitsi da hauteskunde hauetan. Sozialistek ehunekoan eta botoetan izan dute hazkundea 2016ko emaitzekin alderatuz gero.
Hona hemen gaurko hauteskundeen behin betiko emaitzak Hondarribian. Parentesi artean, 2016ko datuak.
- EAJ: 3.464 boto, %48,92 (3.839, %48,17)
- EH Bildu: 1.836 boto, %25,93 (1.640, %20,53)
- PSE-EE: 666 boto, %9,40 (582, %7)
- Elkarrekin-Podemos: 521 boto, %7,35 (1088, %13,62)
- PP+C’s: 329boto , %4,64 (673, %8,42)
- Vox: 92 boto, %1,29
- Equo-Berdeak: 91 boto, %1,28.
- Gainontzeko alderdiek %1etik beherako ordezkaritza lortu dute (eskuineko grafiketan informazio osoa).
