Hondarribia-Irun Turismoak bere webgunea eta promozio liburuak berritu ditu
Materiala bisualagoa eta freskoagoa izatea izan da aldaketen helburu nagusia
Miguel Ángel Paez eta Maria Serrano gaurko aurkezpenean. Argazkia: Bidasoa Bizirik Hondarribia eta Irungo udalek, Bidasoa Bizirik-en laguntzarekin, eskualdeko turismo webgunea eta promozio liburuxkak berritu dituzte.
Egun, webguneak lau hizkuntzetan eskainiko du informazioa (euskara, gaztelania, ingelesa eta frantsesa). Bertan eskualdeko informazio zabala emango du jakitera bisitariei. Batetik, bisitatzeko lekuak aipatuko ditu, bi udalerrietan egin daitezken plan ezberdinekin batera. Bestetik, hirugarren atal batean, zonaldeko ostatu guztien zerrenda agertuko da, eta beste atal batean taberna eta jatetxeei buruzko informazioa. Webgunean, eskualdeko turismo-liburuxkak irakurtzeko aukera egongo da PDF formatuan.
Webgunean bezala, lau hizkuntzetan berritu dira ere promozio liburuxkak. Bi udalerrietako planoak berritu dituzte ere. Orain handiagoak izateaz gain, establezimendu gehiago agertzen dira zerrendan. Promozio liburuxkak eta planoan eskuratzeko bi udalerrietako turismo bulegoetara jo beharko dute interesdunek. Azkenik, eskualdearen sustapen-bideoa ere egin dela adierazi dute arduradunek.
Webgunean, promozio liburuxketan, planoetan eta bestelako aldaketekin materiala bisualagoa eta freskoagoa izatea bilatzen dutela jakitera eman du Miguel Ángel Paez Bidasoa Bizirik-eko presidenteak: “Internetek hainbesteko garrantzia hartu duen mundu honetan, beharrezkoa zen webgunea eguneratzea”. Bere aldetik, Maria Serrano presidenteordeak “aisialdiko turismo baterako ez ezik, publiko profesional batentzat ere diseinatu da webgunea”.
Hotelak eta ostalaritza establezimenduak normaltasunera bidean
Bestetik, nabarmendu beharra dago COVID-19aren pandemiagatik itxita mantentzen ziren eskualdeko hotel eta ostalaritza establezimendu gehienek ateak ireki dituztela azken asteetan. Salbuespenak salbuespen, Hondarribiko eta Irungo ia ostatu, jatetxe eta taberna gehienak irekita daude dagoeneko.
