Hil zutenetik hamabi urtera, Nagore Laffage gogoan izan dute gaur eguerdian Iruñean. Asun Casasola Nagoreren ama bertan izan da.
Iruñean gaur egin duten elkarretaratzean, Asun Casasola Nagoreren ama. Irudia: Twitter @Bedarlari. 
Hamabi urte beteko dira gaur Jose Diego Yllanesek Nagore Laffage hil zuela, eta, aurten Iruñean festarik ez den arren, Laffage oroitu eta omenaldia egin diote. Eguerdiko ordu batean izan da ekitaldia, Vinculo plazan, Nagore Ez zaitugu ahazten, Justizia eta konponketa guztientzat. Bakarrik bai da bai lelopean. Astelehen Lilak elkarte feministak antolatu du bilkura.
Samindura eragin zuen Iruñean Laffageren hilketak. Ez, ordea, hilketak bakarrik. Hasieran, genero-indarkeria kasu gisa ikertu zuten hilketa, baina, Laffageren eta Yllanesen artean bikote harremanik ez zela jakitean, prentsak utzi egin zion genero indarkeria deitzeari.
Horrek zuzenean eragin zuen epaiketan eta Yllanesek jasotako zigorrean. Fiskalak eta Laffageren familiaren abokatuak hogei urteko espetxealdia eskatu zuten Yllanesentzat, hilketa delitu batengatik. Baina herri epaimahaiak ebatzi zuen hilketa ez baizik homizidioa izan zela, eta epaileek hamabi urte eta erdiko zigorra ipini zioten. 2018tik aske dago baldintzapean. 2019an, gainera, hainbat hedabidek zabaldu zuten psikiatra gisa ari zela lanean Madrilgo kontsulta batean.
Bidasoari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Hiriko euskarazko komunitatearen parte izan nahi dudalako. Bidasoak eta bidasoarrok behar dugulako.
