Legia kalean gertatutakoaren gaineko azalpenak eskatu ditu EAJk
«Alkateak eta bere udal gobernuak segurtasun protokoloa ezartzerakoan zuhurragoak eta zehatzagoak izan behar zutela uste dugu. Baita segurtasuna eta osasun neurriak bermatu eta betearazi behar zituztela ere», salatu dute jeltzaleek.
Xabier Iridoy eta Lander Ugartemendia. San Martzial egunean (ekainak 30) Legia kalean emandako jende pilaketen gaineko informazioa eskatu berri du EAJ taldeak. Azalpenak eskatu dizkiote gaur goizean Jose Antonio Santano alkateari.
«Alkateak eta bere udal gobernuak segurtasun protokoloa ezartzerakoan zuhurragoak eta zehatzagoak izan behar zutela uste dugu. Baita segurtasuna eta osasun neurriak bermatu eta betearazi behar zituztela ere», diote jeltzaleek. Esaterako, pilaketak saihesteko eta neurrien ez betetze kasuak egiaztatzeko nahikoa egin ez dutela leporatu diote udal gobernuari. Modu prebentiboagoan jokatu beharko lukeela adierazi dute, «bere esku dituen baliabide guztiak erabiliz».
Amaitzeko, eskerrak eman dizkiete neurriak bete, distantziak errespetatu eta jendetzatik kanpo geratu ziren irundar guztiei. «Aurrera egin nahi badugu, elkarrekin egin behar dugu, arduratsuak izan behar dugu», gehitu dute taldetik.
