Eskualdeko ekonomia bultzatzeko herriko denda eta tabernetan kontsumitzera deitu dute pentsiodunek
Txingudi Pentsiodunen Mugimenduko kideak kezkati azaldu dira COVID 19aren gaitzak eragindako krisi ekonomikoarekin. Herrian bertan kontsumitzeko deia egin dute, baita ere osasun aholkuak mantentzekoa.
Pentsio duinak izan arte, kalean jarraitzeko asmoa dute Txingudiko Pentsiodunek. Txingudi Pentsiodunen Mugimenduko kideak kezkati azaldu dira COVID 19aren gaitzak eragindako krisi ekonomikoarekin. «Covid-19ak eragin duen osasun larrialdiak beste krisi ekonomiko eta sozial ikaragarri bat ekarri du berekin. Kalte horrek gure eskualdeko enpresa txiki asko, komertzio, taberna… egoera ahulean utzi ditu, Bidasoaldeko enpleguan eta familia askoren etorkizunean izan dituen ondoriorekin batera», adierazi dute hedabideei bidalitako ohar batean.
Egoera horren aurrean, bi eskaera egin dizkiete bidasoarrei. Lehenik, osasun aholkuak kontuan hartzeko deia egin diete herritarrei. «Birusaren beste agerraldi bat zoritxar galanta izango litzateke gizon eta emakumeon bizitza eta osasunerako, eta, baita ekonomia suspertzeko ere». Bestalde, herriko denda eta tabernetan kontsumitzera animatu dituzte eskualdeko herritarrak, «guztion artean eskualdeko ekonomia biziberritzeko».
