Tabernen terrazek ordutegi berria dute gaurtik
Larrialdi egoera aurreko ohiko ordutegia berreskuratu dute, 9:00etan zabaltzeko aukera izango da. Ekainaren 15etik aurrera aldiz, ordutegia luzatuko dute.
![Terrazak](https://bidasoa.hitza.eus/site/files/2017/01/Terrazak.jpg)
Irungo Udaleko Bide Publiko sailak jakinarazi berri duenez, gaurtik aurrera hiriko tabernen terrazek ordutegi aldaketa jasango dute. Dagoeneko larrialdi egoera aurreko ohiko ordutegia berreskuratuko dute tabernariek. Hala, 09:00etan irekitzeko baimena izango dute, eta ekainaren 15etik aurrera, ordutegia luzatuko dute.
Ekainaren 15etik irailaren 15era ordutegi bat zehaztu du udalak: igandetik ostegunera 00:00etan itxi ahal izango dute terraza tabernek, eta ostiral, larunbat eta jai egunen bezperetan 01:00ak arte terrazako zerbitzua eskaintzeko aukera izango dute. Epetik kanpo geratzen diren aste eta hilabeteetan aldiz, ondorengo ordutegia zehaztu dute: igandetik ostegunera 23:00etan eta ostiral, larunbat eta jai egunen bezperetan 00:30ean.
2. faseak iraun bitartean terrazen %50a erabili ahalko den arren, udalak gogoratu du %75a jartzeko baimena eman dietela aurretik eskaera egin duten ehun bat tabernariri.