Hondarribiko Mutxiko Eguna bideo bat osatuz ospatuko dute aurten
Parte hartzen duten dantzariei etxean bideo bat grabatzeko edo argazki bat egiteko eskatu die Zumardikoak elkarteak; bildutako materialarekin bideo bat osatuko dute.
Bertan behera geratu da egun osoko dantza plana.
Larrialdi egoerak hala behartuta 2020. urteko Hondarribiko Mutxiko Eguna bertan behera geratu da. Hilaren 10ean, igandearekin, egitekoa zen dantza jaialdia Zumardikoak elkartearen eskutik, nahiz eta aurten ezinezkoa izango den hori burutzea. Hala ere, erritmorik eta animorik ez galtzeko helburuarekin, parte hartzaileak bideo bat grabatzera edo argazki bat egitera deitu ditu elkarteak, eta jasotako material guztiarekin bideo bat osatuko dutela jakinarazi du. Zabaldutako informazioaren arabera, iragan asterako Euskal Herri osotik iritsitako laurogei bideo eta 50 argazki jaso zituzten antolatzaileek.
