[Bideoa] 'Konfinamendutik, askatasunera'
Irungo Sorturen egitasmoz, 260 lagunek euskal presoen aldeko mosaiko birtual erraldoia osatu dute, etxetik egindako argazkiekin.
260 lagunek hartu dute parte bideoan. Konfinamendua ere aldarrikapenerako une aproposa izan daiteke, hala dela erakutsi dute Irungo Sortuko kideek. Izan ere, euskal presoen aldeko mosaiko birtuala osatu dute ehunka irundarrek, Iratxe, Bera, Aitor, Fermo, zuekin gaude! titulupeko bideo batean. Norbere etxean ateratako babes argazkiak bildu dituzte ikus-entzunezkoan, 170 irudi zehazki. Orotara, 260 lagunek euren babes eta elkartasuna bidali dute Frantzia eta Espainiako estatuko kartzeletara. «Mila esker parte hartu duzuen guztiei! Lanean jarraituko dugu denak etxeratu arte!», diote.
Bide batez, Sortuk eta Etxeratek egoeraren gainean egindako irakurketa elkarbanatu nahi izan dute bidasoarrekin. Lehenik, krisiaren aurrean Espainiako gobernuaren jokabidea «arduragabetzat» jo dute. Larrialdi egoera eman zenetik, Euskal Herriko hainbat eragilek, Frantziako zein Espainiako Estatuko gobernuei presondegietan aplikatzeko «premiazko» neurriak eskatu dituztela gogoratu dute. Egoera honetan ere beste alde batera begiratzea leporatu diete.
«Euskal preso politikoek hamarkadak daramatzate salbuespeneko neurriak pairatzen eta bada garaia guzti horien deseskaladarako, denak deuseztatzeko», diote amorruz. Amaitzeko, pandemiaren arriskuak eskatzen dituen prebentzio neurrien aurrean, euskal preso politikoek haien eskubideak babesteko modurik eraginkorrena guztien Euskal Herriratzea «agerikoa» dela nabarmendu dute.
Hona, Irungo Sortuk osatutako bideoa:
