Txapelketa bikoitza jokatu dute Marlaxkako jokalariek asteburuan
EH4 lehiaketan eta Eskolarteko II. Open Txapelketan parte hartu dute Marlaxkako kideek asteburuan online antolatutako norgehiagokan.
Online eskolen eta txapelketen bitartez mantentzen du erritmoa Marlaxkak. 
Konfinamendu garaian ere etengabe lehitzen ari dira Marlaxka Xake Klubeko jokalariak. Online eskolak eta txapelketak burutzen dituzte erritmo eta abileziarik ez galtzeko, eta ildo horretan, Eskolarteko II. Open Txapelketan eta EH4 lehiaketan parte hartu dute Marlaxkako kideek asteburuan.
EH4 txapelketari dagokionez, hainbat gonbidaturekin burutu zuten partida sorta. Marlaxkaz gain, Martintxo (Araba), Santurtzi (Bizkaia) eta Oberena (Iruñea) xake klubak lehiatu ziren jardunanldian, baita Salou (Herrialde Katalanak) Chess Club, Kolonbiako Rhinos Elite Club, eta Jaengo (Espainia) C. D. Dama Morena elkarteak ere.
101 jokalari bildu ditu denera lehiaketak eta Oberenak kluba gailendu da azkenean. Datorren jardunaldian Argentinako Escuela de Talentos klubak ere parte hartuko du.
Eskolarteko II. Open txapelketa
Iragan asteburuan jokatutako jardunaldiaren ondoren, Eskolarteko II. Open Txapelketan parte hartu dute Marlaxkako kideak asteburuan. 220 jokalarik izena eman zuten denera.
Hamar urtetik beherakoen kategorian ia ehun lagun lehiatu ziren, eta denak “modu eredugarrian” aritu arren, Martintxo klubeko Jon Bocos gailendu zen azkenean.
Pielagos (Kantabria, Espainia) Cristian Luca jokalariak irabazi zuen bestalde, hamabi urtetik azpikoen multzoan. Ehun lagun inguru ere lehiatu ziren txanda horretan eta denen artean irabazle suertatu zen Luca.
Azkenik, hamalau urtez beherako mailan, iragan jardunaldiko parte hartze kopurua errepikatzetik gertu (pasa den astean 59 lehiakide izan ziren) egon direla zehaztu dute Marlaxkako kideek. Lehia handiko partidak izan zirela nabarmendu dute klubetik, baina azkenean, Martintxoko Ibon Dominguez gailendu zen.
Izen ematea
Jardunaldi ezberdinetan parte hartzeko interesa duten lagunek ere izena eman dezaketela adierazi dute Marlaxkakoek partidak zale guztiei zuzenduta baitaude. Parte hartzeko ondoko webgunean izena eman behar da lehenbizi; ondoren Marlaxka Xake Klubera gehitu eta azkenik, martxan dauden txapelketetan izena eman beharko dute interesdunek.
