Eragile ekonomikoekin bilduko da udal gobernua, gaur eta etzi
Merkataritza, ostalaritza, turismoa eta zerbitzu enpresak egongo dira ordezkatuak bileran, baita Bidasoa Bizirik-eko teknikariak ere.
Palacete hotela Hondarribiko Alde Zaharreko Gipuzkoa plazan. 
Gaur eta etzi bilduko dira Hondarribiko Udal Gobernuko eta Bidasoa Bizirik garapen agentziako ordezkariak tokiko eragile ekonomikoekin. Orain arte hartutako neurrien berri ematea, eta eragileen kezkak eta proposamenak aztertzea da bideo bileren helburu nagusia.
Txomin Sagarzazu alkateak, Juan Mari Altuna Ogasun eta Hiritarren Segurtasunerako zinegotziak eta Maria Serrano Merkataritza eta Turismo departamentuko arduradunak hartuko dute parte bilkuran, baita Bidasoa Bizirik-eko Eva Fernandez ordezkariak ere.
Eragile ekonomikoak bestalde, hiru sektoretan banatu dituztela zehaztu dute udaletik: batetik, merkatariak; bestetik, ostalariak eta turismo sektoreko ordezkariak; eta azkenik, Hondarribiko zerbitzu enpresak.
Denen iritziak ezagutzeaz gain, komunikaziorako bide “arinak” ezarri nahiko lituzke udal gobernuak modu honetan.
