Irunek bat egin du Maker mugimenduarekin, ospitaleko materiala egiteko
Babeserako biserak eta bestelako materialak egingo dituzte larrialdi egoera bitartean, koronabirusak eragindako krisian osasun zerbitzuei laguntzeko.
3-D inprimagailuekin egingo dute ospitalerako materiala. Irungo Udalak eta Bidasoa Bizirikek Maker mugimenduarekin bat egin berri dute. Babeserako biserak eta bestelako materiala egingo dituzte larrialdi egoerak iraun bitartean, koronabirusak eragindako krisiari aurre egiteko. Horretarako, Irun Factory baliatuko dute.
Gipuzkoa mailako proiektua da Maker; 3-D inprimagailuekin ospitaletan erabilgarriak izango diren materialak sortzen dituzte. CovidGipuzkoa eta DYAk gidatu dute proiektua, eta dagoeneko 1.500dik gora bisera egin dituzte.
Alde batetik, udalak inprimatzeko 100 kilogramo filamentu eskuratuko ditu, CovidGipuzkoak jaso ditzan. Ondoren, bertako kideek egitasmoarekin bat egin duten enpresekin kontaktuan jarriko dira, materiala egiten hasteko. Bestalde, Bidasoa Bizirik inguruko enpresekin kontaktuan jarriko da, lan guztia antolatzeko. Orotara, Irun Factoryn hiru 3-D inprimagailu dituzte.
