Baimenik gabeko lanak egiteagatik 500 euroko isuna jaso du Higertokik
Zaldunborda Gaina eremuko hamar hektareatan udal baimenik gabe «zuhaitz mozketa eta betelanak» egiteagatik jaso du zigor ekonomikoa enpresak.
Zaldunborda eremuko lanen irudia 2020ko urtarrila bukaeran. Higertoki enpresa da lanen arduraduna. 
Hamar hektareatan udal baimenik gabe jarduteagatik 500 euroko isuna jaso duela Higertokik zabaldu du gaur Abotsanitzek. Legez kanpoko zuhaitz mozketa eta betelanak leporatuta otsailaren 27ko data duen 449/2020 alkate dekretu bidez jaso du isuna enpresak. Abotsanitzek nabarmendu duenez ordea, Txomin Sagarzazu alkateak arauhauste «arintzat» jo du gertatutakoa eta «legeak zehazten duen zigorrik txikiena ezarri dio».
Aiako Harria-Jaizkibel korridore ekologikoan 100.000 metro koadro «txikitu» izana egotzi zion udal taldeak Higertokiri uztailean, eta iraila bukaeran enpresaren aurkako salaketa aurkeztu zuen Irungo ertzain-etxean. Prozesu honetan, lanak «klandestinoak» izan zirela onartu zuen Sagarzazuk, baita «legeztagarriak» zirela ere.
Egoera honen aurrean alkate dekretua errekurrituko duela iragarri du udal alderdiak, «zigorra handiagoa beharko lukeela uste dugulako». Taldeak adierazitakoaren arabera, «egindakoa gutxienik 5.000 eta 50.000 euro bitarteko zigorra mereziko lukeen arau hauste larria» da. Areago, alderdiak zehaztu duenez, «arau hauste larrien artean honakoa dago: ‘Lurrak mugitzea eta lurpeko erauzketak egitea lizentziarik, urbanizazio-proiekturik edo, hala badagokio, eskumena duen administrazioaren baimenik izan gabe’».
