Etxebizitza turistikoa erregulatzeko ordenantza aldarrikatu du PSE-EEk
Orain dela hiru urte talde sozialistak aurkeztutako mozioa bete dezan galdegin du Alvarezek, ikerketa bai, baina «araudirik gabe jarraitzen baitugu».
Turisten uholdea Hondarribiko Alde Zaharrera sartzen. 
Eusko Jaurlaritzak gaur zabaldu du bertan behera uzten duela turismo zerga ezartzeko asmoa, eta beraz, aldundien eta udalen esku gelditzen dela araudi ezberdinak osatzea. PSE-EEren Udal Taldeko Iosu Alvarez bozeramaileak berria baliatu du Hondarribiko egoera salatzeko, eta etxebizitza turistikoa erregulatzeko ordenantza aldarrikatzeko. Areago, 2016ko urrian onartutako mozio sozialista bete dezan eskatu dio Alvarezek gobernu taldeari, non ikerketa eta araudia osatzea eskatu zen. Gaur egun, azterketa teknikoa egina dagoela dio bozeramaileak, ez ordea, araudia.
Tasa turistikoa aplikatzeari ez diola uko egiten ere dio Alvarezek oharrean, «sektore turistikoan egin beharreko kontsultak gauzatu ondoren, eta funtzionamenduan jartzea edo ez erabaki». Herritarren etxebizitza eskubideak bermatze aldera proposatzen du talde sozialistak araudia, baita «euren etxebizitzei erabilpen turistikoa eman nahi dieten maizterren segurtasun juridikoa» bermatzea ere.
Ildo horretan, turismoaren eragin «positiboaz» ohartu direla onartzen du Alvarezek: «Eustaten arabera, Hondarribiko jarduera ekonomikoaren %82 zerbitzuen sektoretik dator». Hala eta guztiz ere, «pisu turistikoen kopuruak gora egin ahala, alokairuzko etxebizitzen eskaintzaren beherakada dator». Era berean, alokairurako etxebizitzen prezioen hazkundea nabarmendu du bozeramaileak.
