Jolasa, euskararen familiarteko transmisioa bultzatzeko
Haurrei begirako jolas dinamizazio musikatua egingo dute larunbatean, Familia Ola programaren barruko egitarauan.
Familia Ola egitasmoaren barruko ekintza bat. Irungo Udalak, Euskara arloaren bitartez, Merezi duelako! proiektua hasi zuen iaz, «euskararen familiarteko transmisioa sustatzeko asmoz». Bada, egitasmo horren barruan, Familia Ola programa aurki daiteke; 2 urtetik 8 bitarteko haurrei bideratutakoa.
Familia Ola programaren barruko egitarauan, datorren astebururako haurrei begirako jarduera berezia antolatu dute. Zehazki, euskaldunentzako eta hizkuntza ongi jakin ez baina euskararen erabilera sustatu nahi dutenentzako bideratutako jarduera izango da.
Bada, datorren larunbaterako (hilak 14) Txantxariak ekitaldia egingo dute Arbelaitz kalean, 11:00etatik aurrera. Munduan zehar han eta hemendik bueltaka dabiltzan pertsonaiak dira Txantxariak. Kasu honetan, Braulio astoarekin batera Zabaleta pertsonaia izango dute bidelagun bertaratutakoek. «Jolas dinamizazio musikatu bat izango da, denak dibertigarri, denak gogo-gozagarri». Ordu eta erdiko iraupena izango du.
