Energia berriztagarrien inguruko tailer praktikoa egingo dute udaletxean
Ingurumenarekiko iraunkorra den energiaren ezarpena etxebizitzetan erraztu du araudi aldaketak; horren gainean informatzea izango da bilkuraren helburuetako bat.
Energia berriztagarrien inguruko tailerrak etxebizitzek dituzten aukera eta irizpide ezberdinak aztertuko ditu. 
Gipuzkoako Foru Aldundiko Ingurumen eta Obra Hidraulikoen departamentuak eta Hondarribiko Udalak Energia berriztagarriak zure etxean… posible da! izenpeko tailerra antolatu dute datorren asterako. Gipuzkoa Argitu programaren baitan kokatuta dago jarduera, eta informazioa banatzeaz gain, energia mota honen ezarpen praktikoa ikusteko aukera ere izango dute partaideek.
Araudiak jasandako aldaketek erraztasunak eragin dituzte etxebizitzek energia iraunkorra balia dezaten. «Beharrezkoak diren irizpideak eta ezagupenak modu argi eta ulergarri batean eskaintzea da» tailer honen asmoa, Juan Luis Silanes Ingurumen zinegotziak adierazi duenez.
Hala, «izaera praktikoa izango duen saio bati esker», tankera honetako instalazio bat egiteko «baldintzak zeintzuk diren argituko du energia berriztagarrietan espezializatutako aditu batek». Are gehiago, martxan dauden instalazioek sortutako energia nola erabil daitekeen aztertuko dute tailerrean.
Hitzorduan parte hartzeko interesa duten herritarrek hilaren 16a baino lehen izena ematea ezinbestekoa da: posta elektroniko bidez edo 628532303 telefono zenbakian. Hondarribiko Udaletxeko areto nagusian egingo dute tailerra, hilaren 18an, 18:30ean hasita.
