Jaizkibel izango du protagonista 'Ezagutu zure hiria'-k
Ostiralean eta larunbatean egingo dute azaroari dagokion saioa, nahiz eta eguraldia medio, bertan behera gera daitekeela ohartarazi dute.
Jaizkbel mendia aztergai izango dute ‘Ezagutu zuren hiria’ iniziatiban, azaroan.
Ezagutu zure hiria-ren hurrengo saioa ostiralerako eta larunbaterako antolatu du Arma Plaza fundazioak. Jaizkibel mendia hizpide eta protagonistatzat hartuko dute azaroko saioan. Hala eta guztiz ere, eguraldia dela-eta bertan behera gera daitekeela larunbateko jarduera ohartarazi du fundazioak.
Lehenik eta behin, hitzaldia emango du Jose Manuel Cortizo adituak etzi, ostiralarekin, Jaizkibeletik Antropozenora izenburupean. Aranzadi Zientzia Elkarteko Geologia saileko kidea da Cortizo, eta Jaizkibelgo kostaldeko altxor eta txoko garrantzitsuenak zein ezezagunenak izango ditu hizpide. Ildo horretan, orain dela 50 milioi urtetik gaur egunera arteko ibilbide geologikoa erakutsiko du adituak.
Hortaz, itsasontzian bisita gidatua egitea aurreikusi dute larunbaterako, nahiz eta eguraldia medio, bertan behera geratzeko aukera dagoela ohartarazi dute Arma Plaza fundazioko arduradunek. Plaza guztiak beteta daudela dagoeneko jakinarazi dute, baina iragarpenak dioenaren arabera, bihar goizean hartuko dute azken erabakia.
