Haurren ongizateari begirako topaketa egingo dute Irunen
Haurren ongizatean eragina izan dezaketen gaiak landuko dituzte hilaren 30ean Palmera Montero gunean, egun osoko jardunaldian.
Atzo aurkeztu zuten topaketa. Azaroaren 30ean (larunbata), haurren ongizatearen gaineko topaketa egingo dute Irunen. Egun osokoa da (09:45-18:00, bazkaltzeko tartearekin), eta Palmera Montero gunean izango da. Gazteartean Gazteria Zerbitzuak antolatu du.
Jardunaldia bitartean hainbat hitzaldi eta mahai-inguru egingo dituzte, Rebeca Gonzalez udaleko Gazteria ordezkariak esan duenez. Agerraldian, Eunate Encinas arloko teknikariak lagundu du Gonzalez.
Hala, haurren aisiaren eta portaeraren gaineko hainbat argibide emango dituzte gaian adituek. Hala nola, haurrek naturan jolasteko dituzten aukerez, haurren hezkuntza sortzaileaz, txikienen burmuinaren funtzionamenduaz eta bestelako gaiez hitz egingo dute, hitzaldi bidez.
Jardunaldietan parte hartzeko aurrez izena eman behar da, hilaren 21etik 28ra, Irungo Udalaren webgunearen bitartez. 4-8 adin tarteko haurrentzat haurtzaindegi zerbitzua egongo da. Bertan bazkaltzeko aukera ere egongo da.
Jardunaldien egitaraua
- 09:45. Harrera.
- 10:00. Aurkezpena.
- 10:15-11:45. Hitzaldia (gazteleraz). ‘Naturan jolastu, oso gai serioa’. Hizlaria: Katia Hueso.
- 11:45-12:15. Atsedenaldia.
- 12:15-13:45 Hitzaldia (gazteleraz). ‘Zer ikasi nahi du haurren burmuinak?’. Hizlaria: David Bueno.
- 13:45-15:00. Bazkaltzeko tartea.
- 15:00-16:30. Hitzaldia (gazteleraz). ‘Hezkuntza ulertzeko modu berri baterantz’. Hizlaria: Marian Santamaria.
- 16:30-18:00. Marte Sorkuntzako kideekin batera, arte tailerra familian.
