Arartekoari "oso ona" iruditu zaio Hondarribiko gazteen aurrera urratsa
Arartekoa "pozik" dago Hondarribiko hainbat gaztek emakumeek alardean era askean parte hartzeko egin duten adierazpenarekin.
Manuel Lezertua Arartekoa. Manuel Lezertua Arartekoak, hedabideetara bidalitako oharraren bitartez jakinarazi du “oso ona” dela emakume soldadurik onartzen ez duten konpainietan era batera edo bestera parte hartu duten gazteek emandako aurrera urratsa, “argi eta garbi erakusten baitu gizartea aurrera doala, gazteak buru direla”. Gazteek adostutako adierazpena “jai giroko bizikidetza eredu berri baterantz” joateko bidea dela azaldu du , “non emakumeen eta gizonen erabateko berdintasuna ezin uko eginezko baldintza baita”.
Gazte horien iritzia, bat dator Arartekoak dituen alardeari buruzko datu eta inkestekin, “gizonak eta emakumeak ospakizun horretan berdin barneratzearen aldeko eta bizikidetza baketsuaren aldeko iritzia geroz eta zabalduago dago”. Plastiko beltzekin eta Jaizkibelen kontrako jarrera oldarkorrarekin aritzen direnak “erabateko berdintasuna lortzeko bidean gizarteak izan duen aldaketa onartu nahi ez dutenak” direla zehaztu du Lezertuak.
Gazteen adierazpena babesteaz gain, Arartekoak itxaropena azaldu du emakumeen laster alardean berdintasunean parte hartuko dutela, “modu normalizatu eta baketsuan”.
