EAJ: "Irundarrek euskara lehen mailako hizkuntza izatea merezi dute"
Euskara Aholku Batzordea deitzea eskatu du Xabier Iridoyk. Euskara "bigarren mailako hizkuntz gisa" hartzea leporatu diote udal gobernuari.
Josune Gomez eta Xabier Iridoy, gaur, CBA inguruan. EAJ taldeko bozeramaile Xabier Iridoy eta zinegotzi Josune Gomezek CBA Udal Liburutegia bisitatu dute, euskarak Irunen eta irundarren egunerokotasunean duen “garrantzia” nabarmentzeko. Gainera, hizkuntza sustatzen laguntzeko zenbait proposamen ezagutarazteko ere probestu dute bisita.
Irungo udal gobernuak euskara “bigarren mailako hizkuntza gisa” hartzea salatu nahi izan dute lehenik, hizkuntza “gutxiesten” ari direla. Egun alderdi sozialistak aurrera eramaten dituen ekintza eta jarduerak ikertu, eta zenbait hobekuntza gehitu dizkiote jeltzaleek.
Udaleko Euskara arloak 2018-2022ko epealdirako Euskararen Erabileraren Normalizatzeko Planaren VI. Plangintzaldirako landutako proposamen txostena aztertu du gaurkoan Iridoyk. “Ezer baino lehen, gure iritziz VI. Plangintza jada indarrean izan beharko lukeen plana dela adierazi nahiko genuke. Irunek behar azpimarragarriak ditu euskararen arloan, eta aurrera pauso urriak ikuste ditugu”, salatu du bozeramaileak. Hala, “oposizioko udal taldeek proposamen eraikitzaileak egiteko aukera emango duen” Euskara Aholku Batzordea deitzea eskatu dute.
“Irunek euskara behar bezala zainduko eta sustatuko duen Plan osatuena merezi du, ez kalean soilik baita udalean bertan ere”. Ezberdinen artean plan bat osatzeko premia nabarmendu dute, “denon artean, desberdinen artean” adostutakoa. Amaitzeko, euskara sustatzearen eta hizkuntz berdintasuna bermatzearen aldeko apustua berretsi dute jeltzaleek.
