GKEak eta elkarteak herritarrei gerturatzeko jardunaldia egingo dute igandean
'Hondarribian Elkarlanean' izenburupean, Behe Bidasoa eskualdeko elkarteak eta gobernuz kanpoko erakundeak kalera ateratzeko jardunaldia izango da igandekoa.
Irudian, taldetako ordezkariak eta Larrarte
Hondarribiko eta Irungo elkarteei eta gobernuz kanpoko erakundeei (GKE) zuzendutako Hondarribian Elkarlanean izenpeko jardunaldia antolatu du Hondarribiko Udalak iganderako. «Elkarteak eta GKEak kalera gerturatzea da helburua», azaldu du Gotzone Larrarte Gizarte Zerbitzuetako zinegotziak, «herritarrek entitate horiei aurpegia jarri, eta zein lan egiten duten jakin dezaten».
Igande goizean zehar Butroi pasealekuan izango dira talde ezberdinetako ordezkariak beren jardueraren inguruan hausnartzeko, informazioa emateko, eta norbaitek behar izatekotan, laguntza emateko. Boluntario horiei guztiei aitortza egitea ere dela helburua adierazi du Larrartek.
Hamazazpi taldek parte hartuko dute jardunaldian, besteak beste: Acabe, Ademgi, Behar Bidasoa, Nagusilan, Atzegi… Igandean 11:00etaik 14:30era bitartean garatuko da ekitaldia.
