[Bideoa eta galeria] Etxean da dagoeneko Kontxako Bandera
Arraunlariei harrerarik beroena emateko berdez jantzi da gaur Hondarribia. Ehunka herritarrek bat egin dute Kale Nagusian eta Hermandadearen inguruetan ere.
Pozik ospatu dute den-denek Kontxako Banderaren garaipena 
Irungo Udalak emandako ongietorritik zetorren trainerua Abiyuan txarangak arraunlarien etorrera iragarri duenean. 19:00ak zertxobait pasata ziren Santa Maria arkua igaro dutenean, Hondarribia Arraun Elkarteko kirolariak eta zuzendaritza, baita Irungo alkate Jose Antonio Santano eta Hondarribikoa Txomin Sagarzazu zituzten zain udaletxean. Eta nola ez, Kontxako Bandera. Afizioak ez du huts egin eta espaloiak guztiz bete ditu.
Udaletxeko areto nagusia ere jendez gainezka egon da ongietorria iraun bitartean. Kontent agertu dira arraun elkarteko presidente Joxemi Elduaien eta herriko alkatea, udaletxe barruan adierazi dutenez. Sagarzazuk, gizonen garaipena goraipatu du baina emakumeen eskifaia ere zoriondu nahi izan du, atzo bigarren postua lortu izanagatik.
Elduaienek, bere aldetik, jasotako sostengua eskertu nahi izan du eta garaipen ezin hobea izan dela adierazi du. Izan ere, Alarde Egunarekin eta klubaren 50. urteurrenarekin bat egin du lorpenak.
Udaletxeko harreraren ondoren, Hermandadera abiatu dira kirol elkartekoak, udal ordezkariak, txaranga eta ehunka herritar. Behin bertara iritsita, berriz ere eskaini diete arraunlariek bandera herritarrei, txalo eztanda eraginez. Hondarribia Arraun Elkarteak lortutako 13. Kontxako Bandera izan da aurtengoa.
