"Zuen mundua zulatzen jarraituko dugu", esan dute Moskun
250 pertsona elkartu dira Moskun G7ko atxilotuak askatzea eskatzeko, eta kontragailurra balioan jartzeko. Ertzaintza bertan izan da.
Atzoko elkarretaratzearen une bat. Bidasoaldeko G7EZ! plataformak deituta elkarretaratzea egin zuten atzo arratsean Irungo Moskun, Urdanibia plazan. G7aren gailurraren harira izandako atxiloketak eta “salbuespen egoera” salatzeko bilkura izan zen. 250 lagunek hartu zuten parte. Era berean, G7aren kontragailurraren arrakasta balioan jarri nahi izan zuten mobilizazioarekin. G7ko atxilotuak askatu. Zuen mundua zulatzen jarraituko dugu lelopean egin zuten elkarretaratzea.
Plataformak beste salaketa mezu bat zabaldu du. Izan ere, bertatik zehaztu dute atzoko elkarretaratzea Segurtasun Sailari notifikatu ziotela, baina hala ere, Ertzaintzaren 8-10 furgoneta hurbildu zirela mobilizazioaren tokira, “guztia akordonatu zuten jarrera oldarkorrez”, plataformako kideen arabera. Ertzainei notifikazioa egina zegoela esan, eta poliziek deitzaileei horren berririk ez zutela erantzun zieten.
Notifikazioa ziurtatu, eta bi pertsona identifikatu zituztela esan dute G7EZ! plataformakoek, “haien kontrako eginbideak irekiko zituztela mehatxu egin zuten. Elkarretaratzea baketsu joan zen, haiek agertu arte”.
Elkarretaratzea bitartean agiria irakurri zuten. Hemen dokumentua osorik (PDF artxiboa da).
