Katea auzorako zenbait proposamen aurkeztu ditu PSE-EE taldeak
Irungo alkate Jose Antonio Santanok Katea bisitatu du gaur. Kirol instalazioak eta auzoko elkartea hobetzeko asmoa du talde sozialistak.
Santano alkatea, zerrenda kideekin batera. Irungo alkate Jose Antonio Santanok (PSE-EE) Katea auzoa bisitatu du gaur. Udal hauteskundeetarako auzorako dituzten proposamen berri emateko probestu du bisita; alkatearekin batera lehen postuetan doazen zerrenda kideak izan dira.
Lehenik, Arretxe Ugaldeko kirol instalazioak hobetzeko konpromisoa hartu du alkateak. Bertan, CD Bidasoa eskubaloi taldeek entrenatzeko aukera izan dezaten karpa erraldoia jarri zuen udalak iaz, Uranzu pilotaleku berriaren obrak amaitu bitartean. “Bertan kirol jokaleku estali bat eraiki nahi dugu”, adierazi du Santanok.
Era berean, auzoko elkartea hobetzeko ere zenbait lan egingo dituztela jakinarazi dute, oinezkoen sarbideak hobetzeaz gain. Gainera, kalean ere kirol instalazioak jartzeko konpromisoa hartu du talde sozialistak.
Katea auzorako dituzten proposamenak lantzeko auzotarren eta hiriko kirol taldeen iritziak kontua hartuko dituztela nabarmendu du alkateak.
