Bidasoa, Europara!
Bidasoa eskubaloi taldeak EHF Kopan jokatzeko eskubidea bere egin du. Txapeldunen Ligan aritzeko aukera dute irundarrek, Ligan bigarren bukatzen badute.
Bidasoa Europan izan den urteak. Irudia: CD Bidasoa. Bidasoa eskubaloi taldeak Europan jokatuko du hurrengo sasoian. EHF Kopan aritzeko eskubidea lortu zuen atzo, Bartzelonak Granollers taldeari irabazi ziolako (38-27). 2007an jokatu zuen azkenekoz Bidasoak Europan, beraz, hamabi urteren ondoren, kontinenteko lehiaketa batean ariko dira irundarrak.
Eskubaloi taldeko zuzendaritzak jokalariak, zaleak eta babesleak zoriondu ditu, lorpena kolektiboa izan dela uste dutelako. Aldi berean, EHFn aritzeko baldintzak betetzeko lanean hasi dela nabarmendu du.
Sari potoloagoa
EHFn aritzea ziurtatuta, sari potoloagoa lor dezakete irundarrek. Txapeldunen Ligan aritzea. Egun bigarren da Asobal Ligan talde horia, eta liga leku horretan bukatzen badu, Europako lehiaketa gorenean izango da. Asobal bukatzeko hiru jardunaldi falta dira, ordea. Eta partida zailak izango dituzte aurretik irundarrek: lehena larunbatean da, 20:00etan, Alcobendasen kantxan. Hurrena Logroñoren etxean (maiatzaren 18an) da; Logroño da bigarren posturako lehian duen kontrario nagusia. Ligako azken neurketa hilaren 25ean du, Artalekun, egun laugarren den Cuencaren kontra.
